किलियन एम्बाप्पे : फुटबलको नशा र त्यसको उन्मादले चम्किरहेका सुपरस्टारको कथा
धेरै किसिमले अहिले संसार किलियन एमबाप्पेको खुट्टामा छ। आइतवार विश्वकपमा अर्जेन्टिनासँग फ्रान्सेली टोली पेनाल्टी सुटआउटमा पराजित भए पनि एम्बाप्पे ह्याट्रिक गरेपछि विश्वभर चर्चाको केन्द्रमा छन् ।
२३ वर्षीय एमबाप्पेले गरेको कामलाई धेरै सुपरस्टारहरूले ईर्ष्या मात्र गर्न सक्छन्। विश्वकपको फाइनलमा ह्याट्रिक गर्नु कुनै पनि खेलाडीका लागि सपना हुन सक्छ । एमबाप्पेले पनि त्यस्तै गरेका छन् । यदि उनको टोलीले जितेको मात्रै भए, यो सुनमा सुगन्ध हुन्थ्यो।
त्यसोभए एमबाप्पेको कथा के हो ? फुटबलको लागि उनको नशा र पागलपनबारे बुझ्न, उनको बाल्यकालबाट सुरु गरौं।
फ्रान्सको दश नम्बरको जर्सी लगाउने एम्बाप्पे पेरिसको उत्तरमा रहेको सानो सहर बोन्डीमा जन्मेका थिए। उनी बाहेक उनको परिवारमा एम्बाप्पेका बुबा विल्फ्रेड, आमा फैजा र धर्मभाइ केम्बो इकोको छन्।
उनको परिवार बन्डी फुटबल क्लबको घरेलु मैदानको छेउमा बस्थे। यहाँ उनको कान्छो भाइ एथानको जन्म भएको थियो। एम्बाप्पेले फुटबल मैदानमा पुग्न सडक मात्र पार गर्नुपर्ने थियो । उनी आफ्ना साथीहरूसँग घण्टौंसम्म फुटबल खेल्थे ।
हरेक पल परिवारको साथ
उनका बुबा विल्फ्रेड स्थानीय क्लबहरूमा संलग्न थिए। उनले धेरै टिमलाई प्रशिक्षण पनि दिएका छन् । क्षेत्रमा उनको विशेष सम्मान थियो । पेरिसको फुटबल क्लबहरूमा पनि उनको राम्रो प्रतिष्ठा थियो।
विल्फ्रेडका छोरा एमबाप्पेलाई फुटबलबाहेक अरू केही मन पर्दैनथ्यो। उनी आफ्नो बुबाको वरिपरि घुम्ने गर्थे र आफ्नो बुबाले प्रशिक्षित गरेका टोलीमा फुटबल खेल्थे।
घरका सबै कुरा फुटबलको वरिपरि घुम्ने गर्दथे, चाहे त्यो टिभीमा खेल हेर्ने होस्, साथीहरूसँग म्याच खेल्ने होस् वा स्कूलको फुटबल टोलीबाट खेल्ने होस् ।
एमबाप्पेको हरेक सास फुटबल थियो। उनको कोठाको भित्तामा क्रिस्टियानो रोनाल्डोको पोस्टर टाँसिएको थियो । एमबाप्पेले रोनाल्डोलाई आफ्नो आदर्श मान्छन् ।
एमबाप्पेसँग फुटबलको वरदान छ भन्ने कुरा सुरुदेखि नै स्पष्ट थियो । चाँडै नै उनको सीपको चर्चा पेरिसभर फैलिन थाल्यो। प्रत्येक फ्रान्सेली क्लब र धेरै प्रमुख युरोपेली टोलीका स्काउटहरू पनि सतर्क थिए।
तर एमबाप्पे योजनामा काम गरिरहेका थिए। परिवारले पनि किलियनलाई अर्को केही वर्ष फ्रान्समा बसुन् भन्ने चाहन्थे। यद्यपि, अन्तर्राष्ट्रिय एक्सपोजरलाई अस्वीकार गर्न सजिलो छैन।
त्यसैले परिवारले अन्ततः ११ वर्षीय एमबाप्पेको लागि इंग्ल्याण्डको चेल्सी क्लबको प्रस्तावलाई स्वीकार गर्यो। चेल्सीले एक साताको प्रशिक्षणका लागि किलियनलाई साथमा लिएको थियो । त्यस पछि, किलियनले १२ वर्षको उमेरमा रियल म्याड्रिडसँग एक हप्ता पनि बिताए।
युरोपका यी दुवै ठूला क्लबहरूले किलियनका आमाबुवालाई मनाउने प्रयास गरे तर उनीहरू न त आफ्नो छोरालाई लन्डन पठाउन चाहन्थे न मड्रिड। तर, यी क्लबहरू मागेजति मूल्य तिर्न तयार थिए।
हरेक क्लवले आफूसँग राख्न चाहन्छन्
तर परिवार आफ्नो सुपरस्टारलाई थप परीक्षण गर्न चाहन्थे। जहाँ गए पनि उनी उत्कृष्ट साबित भए । उनी पेरिसको एलिट एकेडेमी क्लेयरफोन्टेमा पनि उत्कृष्ट खेलाडी साबित भए।
सयौं १३ वर्ष उमेरका खेलाडीहरूबाट छनोट गरिएका खेलाडीहरूले यस प्रसिद्ध एकेडेमीमा दुई वर्ष बिताउँछन्। र सप्ताहन्तमा खेलहरू साना क्लबहरूसँग खेलिन्छन्। कहिलेकाहीँ व्यावसायिक क्लबहरू पनि आउँछन्। यदि उनीहरूले खेलाडीलाई मन पराउँछन् भने ती खेलाडीको करियर राम्रो हुन्छ।
यस एकेडेमीमा एमबाप्पेको प्रतिभा देखेर धेरै क्लब उनको पछि लागे। तर, पूरा दुई वर्ष एकेडेमीमा बिताएपछि मात्रै अर्को कदमको निर्णय गर्ने उनको मनसाय थियो ।
सेन क्लबले एक पटक एमबाप्पे उनीहरूको क्लवमा आउँदैछन् भन्ने महसुस गरे तर अन्तिम क्षणमा एम्बाप्पेले मोनाको रोजे। मोनाकोले उनलाई चाँडै मुख्य टोलीमा खेलाउने वाचा गरेको थियो। १५ वर्षीय एमबाप्पेलाई अरु के चाहियो ? फुटबलको लागि उनको पागलपन सीमा भन्दा बाहिर थियो।
मोनाकोमा, उनी युवा टोलीमा समावेश हुन थाले। तर उनको सपना आफ्नो आइडल अर्थात् रोनाल्डो जस्तै च्याम्पियन्स लिग खेल्ने थियो ।
एम्बाप्पेको ठूलो सफलता बुझ्न, उनको परिवार बुझ्न आवश्यक छ। सम्पूर्ण परिवार सधैं उनको साथ थियो। जब एमबाप्पे मोनाको गए, सबै त्यहाँ गए।
उत्कृष्ट खेल खेलेर पनि मोनाकोको सिनियर टोलीमा मौका नपाएपछि उनले कडा विरोध गरे ।
अन्ततः डिसेम्बर २०१५ मा मोनाको फुटबल क्लबका प्रशिक्षक लियोनार्डो जार्डिमले एमबाप्पेलाई मौका दिए। मोनाकोका लागि १६ वर्ष ३४७ दिनको उमेरमा खेल्दै उनले थोरी अनरीको सबैभन्दा कान्छो क्लब खेलाडीको कीर्तिमान तोडे।
चाँडै उनले मोनाको क्लबका लागि सबैभन्दा कान्छो गोलकर्ता बन्ने कीर्तिमान पनि बनाए।
त्यसपछि उनलाई कसैले रोक्न सकेन । १५ मार्च २०१७ मा १८ वर्ष ९५ दिनको उमेरमा पहिलो पटक फ्रान्सको राष्ट्रिय टोलीबाट खेल्ने मौका पाए । अर्को खेलमा एमबाप्पेले पहिलो गोल गरेका थिए ।
त्यसपछि उनलाई युरोपका सबै क्लबमा अनुबन्ध गर्ने प्रतिस्पर्धा भयो ।
रियल मड्रिडले एमबाप्पेलाई आफूसँग जोड्न सक्दो प्रयास गरेको थियो । क्लबले धेरै ट्रायलहरू गरायो, मैत्रीपूर्ण खेल खेल्यो, जिदान र रोनाल्डोसँग परिचय गरायो। क्लबले उनलाई आकर्षक प्रस्तावहरू दियो तर केहीले काम गरेन।
अन्तमा, एमबाप्पेले फ्रान्सको प्रसिद्ध क्लब पीएसजी रोजे। १३० मिलियन पाउण्डको सम्झौतापछि पीएसजीले पाँचमध्ये चार लिग वन उपाधि जितेको छ।
र जस्तो कि अंग्रेजीमा भनिन्छ – द रेस्ट इज हिस्ट्री ।
क्याटेगोरी : समाचार
प्रतिक्रिया